ភ្នំពេញ៖ គណៈកម្មាធិការអន្តរជាតិនៃកាកបាទក្រហម (អាយ.ស៊ី.អរ.ស៊ី) បានផ្តល់ថវិកាចំនួន ៨៦ ២៨៨ដុល្លារអាមេរិក សម្រាប់អនុវត្តកម្មវិធីជាក់លាក់ទៅតាមផែនការដែលបានកសាងរួមគ្នាជាមួយកាកបាទក្រហមកម្ពុជា ដោយផ្តោតលើ ការងារស្តារទំនាក់ទំនងគ្រួសារ ការការពារបដិរូបលើកកម្ពស់គោលការណ៍គ្រឹះច្បាប់មនុស្សធម៌អន្តរជាតិ ការពារសុវត្ថិភាពសហគមន៍ និងពិការភាព និងបន្តតាមដានការរីកចម្រើននៃការអនុវត្តក្របខណ្ឌបំពេញការងារប្រកបដោយសុវត្ថិភាព។
ការចុះហត្ថលេខាផ្ដល់ហិរញ្ញប្បទានថវិកានេះធ្វើឡើងនៅ ទីស្នាក់ការកណ្ដាលកាកបាទក្រហមកម្ពុជា នារសៀលថ្ងៃទី២ ខែកុម្ភៈ ឆ្នាំ២០២៣ រវាងអគ្គលេខាធិការកាកបាទក្រហមកម្ពុជា ពុំ ចន្ទីនី និងប្រធានបេសកកម្មគណៈកម្មាធិការអន្តរជាតិនៃកាកបាទក្រហម (អាយ.ស៊ី.អរ.ស៊ី.) ប្រចាំតំបន់ (កម្ពុជា ឡាវ និងវៀតណាម) លោកស្រី ឌីណា ហ្វីស៊ើរ។
ក្នុងឱកាសនោះលោកស្រី ឌីណា ហ្វីស៊ើរ បានថ្លែងអំណរគុណចំពោះកិច្ចសហប្រតិបត្តិការល្អៗកន្លងមក និងធ្វើការកោតសសើរចំពោះ កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក្នុងការដឹកនាំកាកបាទក្រហមកម្ពុជា កាន់តែមានភាពរឹងមាំ។
លោកស្រីប្រធានបេសកម្ម អាយ.ស៊ី.អរ.ស៊ី. រូបនេះក៏សូមកោតសសើរចំពោះ រាជរដ្ឋាភិបាលកម្ពុជា ក្នុងការបោសសំអាតមីន នៅតាមតំបន់ប្រឈមមួយចំនួន នៅក្នុងប្រទេសកម្ពុជា។ លើសពីនោះទៀតកម្ពុជា ក៏បានបណ្តុះបណ្តាលអ្នកដោះមីន ទៅដល់ ប្រទេសអ៊ុយក្រែនថែមទៀតផង។
អគ្គលេខាធិការ ពុំ ចន្ទីនី បានអរគុណដល់ ICRC ដែលតែងតែឧបត្ថម្ភគាំទ្រដល់សកម្មភាពកាកបាទក្រហមកម្ពុជា និងកិច្ចសហប្រតិបត្តិការល្អ ក្នុងគ្រប់ស្ថានភាពនយោបាយ ជាពិសេស ចាប់តាំងពីក្រោយថ្ងៃរំដោះ ៧ មករា ១៩៧៩ និងជួយបច្ចេកទេសពង្រឹងការអនុវត្តច្បាប់មនុស្សធម៌អន្តរជាតិ ការអនុវត្តកម្មវិធីជាក់លាក់ ព្រមទាំងមានផែនការប្រចាំឆ្នាំ ដូចជា៖ ផ្សព្វផ្សាយលើកកម្ពស់គោលការណ៍គ្រឹះ សួរសុខទុក្ខអ្នកទោស ស្តារទំនាក់ទំនងគ្រួសារ។
លោកស្រីអគ្គលេខាធិការបានបញ្ជាក់ថា ការពិភាក្សាថ្ងៃនេះដែរ ភាគីទាំងពីរមានការផ្តោតទៅលើខ្លឹមសារមួយនៅក្នុងបរិបទតំបន់ និងពិភពលោក គឺការប្រែប្រួលអាកាសធាតុ ដែលជាបញ្ហាមួយកំពុងតែប្រឈមជាសកល ហើយភាគីទាំងពីរនិងបន្តផ្លាស់ប្តូរ ទំនាក់ទំនងព័ត៌មានឱ្យគ្នាទៅវិញទៅមក ដើម្បីតាមដានក្នុងការវិវត្តន៍ការងារឲ្យកាន់តែជិតស្និត ហើយនៅក្នុងបរិបទជំងឺកូវីដ-១៩ កិច្ចសហប្រតិបត្តិការមួយចំនួនមិនបានអនុវត្តតាមផែនការគ្រោងទុក ដូច្នេះក្នុងកិច្ចពិភាក្សានេះដែរ កាកបាទក្រហមកម្ពុជា បានស្នើសុំ អាយ.ស៊ី.អរ.ស៊ី. គិតគូឡើងវិញឲ្យមានសកម្មភាពឡើងវិញនៅឆ្នាំ២០២៤ និងឆ្នាំក្រោយៗទៀត៕
